Munyin musik cedag-cedug, uyak disko maimbuh andus roko ngiasin kamarne I Cedar, anak lanang sane dados mahasisya ring Buleleng sane sampun semester 3. Nanging boya ja sekadi mahasisya lianan, I Cedar tusing ja nyalanang swadharmane dados mahasisya ne sapatutne malajah. Lekad ipune rinuju tumpek kandang tusing pelih I Cedar setata malaksana corah kadirasa cara burone, males, belog, apa buin nguluk-nguluk meme bapane. Reramane suba puntag-pantig ngalih pipis, lemah peteng magae anggon bekel utawi prabeya kuliahne I Cedar. Meme bapane sanget pesan nyagerang I Cedar apang dadi jadma mawiguna. Sakewala I Cedar bikasne tusing care ne arepang meme bapane, ia setata mogbog. Timpal-timpalne dikampus ngorahin apang seleg kuliah, nanging I Cedar setata masaut “Ngujangin jemet-jemet kuliah?”, “Dosen nu seger”, “Bupati nu idup, apa buin Gubernur tonden mebo tanah, nyen kal ganti?”. Pragat keto dogen pasautne I Cedar.
“Duh, sing kodag naenang kebus gumine di Buleleng, kadirasa mapeluh uling sirah kanti song jit, yen makelo cang ngoyong dini, mirib ngancan puun kulite dadi krupuk”. Munyine I Cedar dikamar kosne ne maukuran 3x3 meter sambilanga makipasan tusing engsap di bibihne misi roko akatih. Gelisin cerita jani suba semesteran. Ia lakar mayah uang bulanan utawi SPP ne liune telungatak tali rupiah. Uling selidan ia suba makeneh lakar mogbogin meme bapane , laut prajani nelpon memene apang ngirimin pipis. “Me, jani tiang suba semesteran, lakar mayah SPP ne liune tlungatak tali rupiah, nanging tiang nagih pipis satu juta me! Sisane lakar anggon tiang mayah iuran dijurusan.” Memene tusing masaut apa lianan teken nah.
Kacrita I Cedar suba nerima pipis ane kirimange teken memene. Lega pesan kenehne I Cedar, wireh marasa aluh mogbogin memene. Pipise ane liune satu juta ento tuah anggone mayah SPP, sisane lakar anggone maliang-liangan. Disubane keto I Cedar kekampus, nanging boya ja kuliah, ia tuah mayah SPP suwud ento lantas ngencolang luas maliaang-liangan, disubane neked diparkiran ditu ade timpalne matakon “dar, kal kije cai?”. “Cang lakar les malu kejep”. Keto pasautne ne tusing nyandang kagugu, lantas ia negakin motorne tur magedi, luas meli panganggo nganti kuliahne engsapange.
Malam minggu, selida I Cedar suba mapayas rapi, maepatu lan ngganggo lengis miyik ne nomer satu. Timpal-timpal kosne makejang nakonin ia, “lakar kije dar?”, “Cang lakar les malu”. Keto pasautne I Cedar sane setata maboya. Lantas Icedar ngencolang menekin sepeda motorne ne tangkine care batun nangka, ia luas nganginang nuju desa Bungkulan, tusing madaya I Cedar keliabne lakar ngalih dagang patok lan be matah. Boya ja les nanging ngelesin.
Sawatara suba jam satu peteng I Cedar maliang-liangan, punyahtusing inget apa. Majalan srayang-sruyung, pipisne telah. Ia laut lakar mwali kekosne. Disuba dijalane ia tusing beneh negakin sepeda motorne, ngangin kauh, tusing karuan apa. Dini suba karmaphalane I Cedar, ia nemu sengkala nabrak terek ane sedeng parkir disisin jalane. I Cedar glalang-gliling, puntag-pantig motorne benyah, keto masi awakne I Cedar telah amah aspal lan tusing nyidayang bangun. Ento suba karmaphalane demen mogbogin rerama ne jani tepukine.
Ade Verawan
0 komentar:
Posting Komentar